Биыл қазақтың дәстүрлі әншілік өнерін, халық музыкасын жаңа белеске көтеріп, өз шығармаларымен толықтырған ірі тұлға, ақын Біржан сал Қожағұлұлының туғанына 190 жыл толуына орай Біржан сал атындағы аудандық мәдениет үйінің сахнасында Қазақстан Республикасының еңбек сіңірген қайраткері Жолтай Жұмат Әлмашұлының «Біржан едім қайтейін…» атты тарихи драмасы қойылды.
«Тұлпар аунаған жерде түгі қалады», демекші атақты Біржан сал бабамыздың туған жерінде сахналанған қойылымда Біржан салдың тартысқа толы қиын кезеңдегі тағдырын, шоқтығы биік, қайталанбас дара тұлға екендігін, санқырлы таланты мен күрделі күреске толы тағдырын қойылым авторы көркемдеп бейнелесе, режиссер Қазақстан Республикасының мәдениет қайраткері Сабыралы Байғазы Кемелбайтегі халыққа шебер жеткізіп, көрерменнің жүрегіне жол тартты.
Тарихи драманы Біржан сал атындағы аудандық «Шежіре» халықтық театрының ұжымы жоғары деңгейде сахналаса, Біржан салдың әуезді әнін орындап, рөлін сомдаған Біржан сал ауданы Үлгі ауылдық мәдениет үйінің ұйымдастырушысы Даулет Мұхтархан көрерменнің ыстық ықыласына бөленді.
Айта кететін болсақ, ұлы тұлғамыз Біржан салдың 190 жылдығын мерекелеу аясында, әнші-композитордың өмірі мен шығармашылығын насихаттап, ұрпаққа дәріптеу мақсатында, жыл басынан бастап Ақмола облысында республикалық, облыстық және аудандық деңгейде 500-ге жуық іс-шара өткізілді.
Бүгінгі өткен «Біржан едім қайтейін…» атты тарихи драмасы іс-шара легінің тамаша қорытындысына айналды.
