Ақмола облыстық Полиция департаменті баспасөз қызметінің мәліметінше, биылғы жылғы қазанның 27-де кешкі сағат 19:49-да Біржан сал ауданының ПБ кезекшілік бөліміне Үлгі ауылының 35 жастағы тұрғыны хабарласып, 1989 жылы туған әйелі Динара Жеңісқызы Рахимованы іздеп табуға көмек сұраған.
Ер адамның сөзінше, әйелі 27 қазан күні сағат 16:20 үйінен шығып кеткен, содан бері хабарсыз. Бұл жағдай сотқа дейінгі тергеудің «адамның жоғалып кетуі» бірыңғай тізілімінде тіркелді. Іздестіру жұмыстарына Біржан сал және Бурабай аудандарындағы полиция бөлімдерінің жеке құрамы, жұртшылық және оларға берілген күштер жұмылдырылды.
«Полицейлер сарай ғимаратын, шаруашылық құрылыстарын, қараусыз қалған ғимараттар мен құрылыстарды сүзіп шықты. Бейнебақылау камераларының жазбаларын зерттей келе, Д.Рахимова сағат 16:20 шамасында «Степняк-Щучье» автожолына шығып, жол бойымен Щучье қаласына қарай бет алғандығын анықтады. Қазіргі уақытта жоғалған адамның орналасқан жерін анықтау бойынша жедел-іздестіру шаралары жүргізілуде», — деді ведомстводан.
Жоғалған адамның белгілері: бойы 165-170 см, дене бітімі мығым, шашының ұзындығы орташа, қара түсті, көздері қара, тік мұрынды, ерні жұқалау келген, құлақтары жабысқан.
Үстіне ақ түймелері бар көк түсті күртеше, сұр түсті әйелдер қалпақшасы, «R» әрпі және ақ жолағы бар қара түсті рюкзак, ақ табаны бар қара түсті спорттық кебіс, қара түсті трико киген.
Д.Рахимованы көрген адамдар болса, дереу 8(716-39) 2-10-02, 2-17-38, 2-15-33 немесе «102» телефондары арқылы хабарласуға болады.
