Ағымдағы жылдың 30 қыркүйегінде Ақмола облысы Қоғамдық кеңесінің кезекті отырысында облыстық Антикордың 9 айдағы жұмыс қорытындылары талқыланды.
Сөз сөйлеу барысында Сыбайлас жемқорлыққа қарсы іс-қимыл агенттігінің облыстық департаментінің бірінші орынбасары Сағыныш Аяғанова өңірде медициналық әлеуметтік сақтандыру қызметінде сыбайлас жемқорлық тәуекелдерін төмендету бойынша қабылданып жатқан шаралар, сондай-ақ іске асырылып жатқан «Бизнеске жол», «Сыбайлас жемқорлыққа қарсы еріктілік» және «Сатып алулардың бірыңғай терезесі» жобаларының нәтижелері туралы хабарлады.
Отырыста ауыл шаруашылығы тауарын өндірушілерді субсидиялау кезінде, оның ішінде «Ауыл аманаты» мемлекеттік бағдарламасы бойынша 3-тоқсанда аяқталған сыбайлас жемқорлық тәуекелдеріне сыртқы талдаудың нәтижелері егжей-тегжейлі талқыланды.
Облыстық ауыл шаруашылығы басқармасының басшысы Кенеш Әлімжанов анықталған сыбайлас жемқорлық тәуекелдерін жою бойынша қабылданып жатқан шаралар туралы айтып берді.
Сонымен қатар, отырыста «Ақшаны бояу» қағидаты бойынша бюджет қаражатын бақылауға мүмкіндік беретін «Цифрлық теңге» жобасы таныстырылды.
Бұл жоба Ақмола облысында «Ауыл аманаты» мемлекеттік бағдарламасы бойынша ауыл тұрғындарын несиелендіру аясында бөлінген бюджет қаражатын бөлу және кәсіпкерлерге ауыл шаруашылығы техникасын сатып алуға инвестициялық субсидия беру барысында пилоттық режимде жүзеге асырылуда.
Жалпы, бұл цифрлық шешімдер агроөнеркәсіптік кешен саласындағы сыбайлас жемқорлық тәуекелдерін жоюға мүмкіндік береді.
Кездесу қорытындысы бойынша ұсыныстар әзірленіп, уәкілетті органдарға тиісті нұсқаулықтар берілді.
