Мемлекет басшысының тапсырмасына жауап ретінде іске асырылатын «Ауылдық денсаулық сақтауды жаңғырту» ұлттық жобасы аясында Есіл ауданының екі ауылында дәрігерлік амбулатория салынып жатыр.

Бұл медициналық объектілерді құрудың негізгі мақсаты ауыл тұрғындарын алғашқы медициналық-санитарлық көмекпен қамтамасыз ету, сондай-ақ асқынулардың алдын алу үшін профилактикалық тексерулердің, скринингтердің, ауруларды ерте анықтаудың және уақтылы медициналық көмек көрсетудің қолжетімділігін арттыру болып табылады.

Свободный және Ақсай ауылдарында тұрғындар көптен күткен жаңа дәрігерлік амбулаториялар пайда болады. Бұрын ауылдарда медициналық қызметтерді тек бір жалпы практика дәрігері, оның өзі осы мақсаттарға арналмаған ғимаратта көрсеткен. Жаңа амбулаториялар күніне 45 адамға дейін қабылдайтын болады.

Азамат Қожахметов, Есіл аудандық ауруханасының бас дәрігері:

— Дәрігерлік амбулаторияларда бір жалпы практика дәрігері және медициналық көмек көрсететін үш медбике болады. Амбулаториялар барлық талаптарға сай болады және қажетті медициналық жабдықтармен жабдықталады. Свободный ауылында салынып жатқан нысанның құны 320,3 млн теңгені, ал Ақсай ауылында — 325,9 млн теңгені құрайды. Қаржыландыру республикалық бюджеттен «Ауылдық денсаулық сақтауды жаңғырту» бағдарламасы аясында жүзеге асырылады.

Бүгінгі таңда Есіл ауданында күндізгі стационардың 45 орнына есептелген 7 дәрігерлік амбулатория жұмыс істейді.