Ақмола облысы бойынша сыбайлас жемқорлыққа қарсы іс-қимыл департаменті мен «Тыныс» АҚ басшылығы квазимемлекеттік сектордағы сыбайлас жемқорлықтың алдын алу мәселелерін талқылады.
Кездесу барысында Департамент басшысының бірінші орынбасары Айдос Жақиялин қатысушыларға соңғы бірнеше жылдағы заңнамадағы сыбайлас жемқорлыққа қарсы жаңашылдықтарды түсіндірді.
Атап айтқанда, спикер сыбайлас жемқорлық үшін жауапкершіліктің бұлтартпастығын қамтамасыз ету аясында квазимемлекеттік сектордағы сыбайлас жемқорлық құқық бұзушылықтардың әлеуетті субъектілерінің ауқымы кеңейгенін атап өтті. Оларға сатып алуды ұйымдастыру және өткізу жөнінде шешімдер қабылдауға уәкілетті не мемлекеттік бюджеттен және Ұлттық қордан қаржыландырылатын жобаларды іске асыруға жауапты адамдар жатады.
Сондай-ақ квазимемлекеттік сектор ұйымдарының басшылары бағынышты қызметкерлердің сыбайлас жемқорлық үшін дербес жауапты. Ал сыбайлас жемқорлық қылмыс жасаған тұлғаларға квазимемлекеттік сектор субъектілеріне жұмысқа орналасуға өмір бойы тыйым салынады.
Сыбайлас жемқорлыққа қарсы саясаттың 2022-2026 жылдарға арналған тұжырымдамасында мемлекеттік сатып алулар мен квазимемлекеттік сектордың сатып алулары үшін бірыңғай талаптар белгілеу көзделген, бұл осы саланы реттеудегі біріздендірілген тәсілді қамтамасыз етуге көмектеседі. Бюджет қаражатын және квазимемлекеттік сектор ұйымының активтерін пайдалану тиімділігін арттыру мақсатында мемлекеттік аудит және қаржылық бақылау органдарының жүйесі оңтайландырылады.
Бұдан басқа, стратегиялық құжатты іске асыру шеңберінде квазимемлекеттік сектор субъектілерінің комплаенс-қызметтерінің жұмысында Сыбайлас жемқорлыққа қарсы қызметтің үйлестіру рөлін күшейту көзделген.
«Квазимемлекеттік сектордағы сыбайлас жемқорлыққа қарсы күрестің жазалау шараларымен қатар ұйымдардың адал мінез-құлқын ынталандыру, бизнес-ортада сыбайлас жемқорлыққа қарсы иммунитетті нығайту да маңызды. Бүгінгі таңда квазимемлекеттік компанияларда корпоративтік парасаттылық стандарттарын сақтауға жауапты комплаенс институты тиімді жұмыс істейді. Комплаенс-офицерлерді сыбайлас жемқорлыққа қарсы оқыту жүргізілуде», – деді Айдос Жақиялин.
Сондай-ақ, кездесуге қатысушыларға адал кәсіпкерлердің құқықтарын мемлекеттік құрылымдардың заңсыз араласуынан қорғау бойынша Антикор қабылдап жатқан шаралар туралы айтылды.
Өз кезегінде компания басшылығы жүргізіліп жатқан алдын алу жұмыстары туралы хабардар етіп, сыбайлас жемқорлыққа қарсы іс-қимыл шеңберінде сындарлы өзара іс-қимылға дайын екендіктерін білдірді.
Айта кетейік, «Тыныс» АҚ – мемлекеттік қорғаныс тапсырысын орындайтын Ақмола облысындағы ең ірі өнеркәсіптік кәсіпорындардың бірі. Кәсіпорын «Қазақстан инжиниринг» Ұлттық компаниясының құрамына кіреді. Қызмет бағыты – ауыр машина жасау және өндірістік технологиялар.
