Алаяқтардың әрекеттері туралы көптеген ескертулерге қарамастан, азаматтар әлі де қылмыстық манипуляцияларға ұшырайды, нәтижесінде олар өз қаражаттарынан айырылады.
Мәселен, ағымдағы жылдың 27 желтоқсанында Ерейментау АПБ полиция бөліміне жергілікті тұрғын келіп, белгісіз ер адамның телефонына қоңырау шалып, өзін Каспий банкінің қызметкері ретінде таныстырғанын хабарлады.
Арызданушының айтуынша, қоңырау шалған ер адам оған банктің қосымшасында белгісіз адамдар оның сенімді нөмірін өзгертуге тырысып жатқанын және ҚР үш түрлі банктерінде оның атына несиелер ресімдеу бойынша іс-қимылдар жүргізіп жатқанын хабарлаған.
Жағдайды жан-жақты ойлауға уақыт бермей, алаяқ ер адамды қолма-қол ақшаны сақтап қалу үшін телефонға «AnyDesk» қашықтан қол жеткізу қосымшасын жүктеп, «қайталама несие» рәсімдеу керектігіне сендірген.
«ForteBank» қосымшасында қаскүнем жәбірленушінің атына «Блю» картасын ашып, қашықтан қол жеткізу қосымшасы арқылы оның атына 4 млн.747 мың теңге сомасында несие ресімдеген. Содан соң алаяқ ақшаны өтініш берушіге белгісіз шотқа аударған.
Жәбірленуші несиелік алаяқтардың әрекеттері туралы білгенін, дегенмен олардың қылмыстық айла-шарғыларына көнгенін мойындады.
Осындай оқиға 26 желтоқсанда полицияға арыз берген Ақкөл ауданының тұрғынына да қатысты. Жергілікті тұрғын алаяқтардың іс-әрекетінің құрбаны болып, 2 млн.теңге сомасында ақша қаражатынан айырылған.
Полицейлер жәбірленушілердің ақшалай қаражатын Павлодар және Алматы қалаларындағы қаскүнемдер алғанын анықтады. Полиция қызметкерлері ForteBank-ке банк карталарынан ақша қаражаты алынған пайдаланушылардың толық сауалнамалық деректерін, сондай-ақ осы қылмыстың ашылуына ықпал ететін басқа да деректерді анықтау мақсатында тиісті сұрау салулар жолдады.
Екі факті бойынша ҚР ҚК 190-бабы «Алаяқтық» бойынша сотқа дейінгі тергеу басталды. Күдікті адамдарды анықтауға бағытталған жедел-іздестіру және іздестіру іс-шаралары жүргізіледі.
