Бүгін мемлекеттік қызметшінің кәсіби-тұлғалық болмысын жетілдіруге бағытталған қадамдық жоспарды жүзеге асыру аясында ҚР Мемлекеттік қызмет істері агенттігінің Ақмола облысы бойынша департаментінің ұйымдастыруымен Достық үйінің мәжіліс залында «Заманауи мемлекеттік қызмет: тең жағдайлар мен мүмкіндіктер» тақырыбында диалогтық алаңы ұйымдастырылды.
Диалогтық алаңға облыс әкімінің орынбасары Алтынай Әміренова, «Шанс» мүгедектерді оңалту орталығының басшысы Василий Шиманский, «Акмолинская правда» газетінің тілшісі, Әдеп жөніндегі кеңес мүшесі Нина Митчинова, ҚР Президенті жанындағы мемлекеттік басқару академиясының облыстық филиалының директоры Ержан Жаров, Ақмола облысы әкімі аппаратының әдеп жөніндегі уәкілі Ainagul Zhanadilova, облыстық санитарлық-эпидемиологиялық департаментінің басшысы Айна Мусина, тәжірибелі және жас мемлекеттік қызметшілер, БАҚ өкілдері шақырылды.
Іс-шара барысында Департамент басшысы Думан Әбілев мемлекеттік қызметке түсу және оны өткеру кезінде барлық азаматтарға заңнамалық негізде тең жағдайлардың қамтамасыз етілетінін және жыл сайын осы мәселені одан әрі жетілдіруге ерекше көңіл бөлініп жатқанын айтты. Сонымен қатар Департаменттің мемлекеттік қызмет басқармасының басшысы Райхан Братаева мемлекеттік қызметтегі әйелдердің үлесі туралы баяндама жасап, соңғы жылдардағы өзекті статистикалық мәліметтермен бөлісті.
Кездесуде гендерлік теңдік, мемлекеттік қызметтегі және қоғамдағы әйелдердің рөлі, меритократия қағидатының жүзеге асырылуы, мүмкіндіктері шектеулі азаматтарға жағдай жасау, жастарды мемлекеттік қызметке тарту және ынталандыру, т.б. мәселелер талқыланды.
