Мемлекеттік қызметшілер арасында сыбайлас жемқорлықтың алдын алу шеңберінде Ақмола облысы бойынша Сыбайлас жемқорлыққа қарсы қызмет Агроөнеркәсіптік кешендегі облыстық аумақтық инспекция ұжымымен кеңес өткізді.
Кездесу барысында өңірдің Сыбайлас жемқорлыққа қарсы іс-қимыл департаментінің қызметкері Аманжол Құсайынов қатысушыларды сыбайлас жемқорлыққа қарсы іс-қимыл саласындағы заңнамалық новеллалар және алдағы 5 жылға арналған Сыбайлас жемқорлыққа қарсы саясат тұжырымдамасының негізгі үрдістері туралы хабардар етті.
Мәселен, Тұжырымдамада «ақшаны қадағалау» қағидатын енгізу бастамасы, яғни міндетті қаржылық тергеу арқылы сыбайлас жемқорлық үшін жауапкершіліктің бұлтартпастығын қамтамасыз ету көзделген. Жосықсыз мемлекеттік қызметшілерді анықтау мақсатында парасаттылыққа тексеру институты (integrity check) іске асырылуда.
Сондай-ақ, бағынышты қызметкерлердің сыбайлас жемқорлық жасағаны үшін басшылардың отставкасына түсуі және тәртіптік жауапкершілігі институты іске асырылуда, сондай-ақ ауыр мен аса ауыр сыбайлас жемқорлық қылмыс жасағаны үшін сотталған адамдарға шартты түрде мерзімінен бұрын босатуды қолдануға тыйым салу енгізілген. Жауапкершілікті қатаңдату тек заңсыз сыйақы алушыларға ғана емес, пара берушілер мен пара делдалдарына да қатысты.
Айта кетейік, ағымдағы жылы АӨК саласындағы екі инспектор Тастанов пен Исмаилова сотталды, олар адамдар тобында алдын-ала сөз байласып, кәсіпкерлерді әкімшілік жауапкершілікке тартпағаны және карантиндік сертификаттарды іс жүзінде тексеруге шықпастан бергені үшін пара алған және алдау арқылы заңсыз материалдық сыйақы алған.
Спикер атап өткендей, мемлекеттік инспекторлар бақылау өкілеттіктеріне ие бола отырып, азаматтар алдындағы елеулі жауапкершілікті сезінуі және қоғам тарапынан сенімсіздік үшін қандай да бір себептерге жол бермеуі тиіс.
Сонымен қатар, аумақтық инспекция қызметкерлеріне сыбайлас жемқорлық фактілері туралы хабарлағаны үшін адамдарды марапаттаудың сараланған жүйесі және 1424 Сall-орталығының жұмысы туралы айтылды.
