Ақмола облысы бойынша Сыбайлас жемқорлыққа қарсы іс-қимыл департаментінің Antikor оrtalyǵy алаңында сыбайлас жемқорлыққа қарсы комплаенс-қызметтердің жұмысы және сыбайлас жемқорлық тәуекелдеріне ішкі талдау жүргізу мәселелері бойынша өңірдің квазимемлекеттік секторының өкілдерінің қатысуымен семинар-кеңес өтті.
Семинар барысында өңірлік Сыбайлас жемқорлыққа қарсы қызметтің аға офицері Даниар Каконов бүгінгі таңда сыбайлас жемқорлыққа қарсы комплаенс квазимемлекеттік компаниялар мен жеке сектор ұйымдарында сыбайлас жемқорлықтың алдын алудың және парасаттылық қағидаттарын қамтамасыз етудің заманауи құралдарының бірі болып табылатынын атап өтті.
«Өздеріңіз білетіндей, квазимемлекеттік және жеке секторларда сыбайлас жемқорлыққа қарсы іс-қимыл шараларын күшейту мақсатында бірқатар заңнамалық түзетулер қабылданды, оның ішінде сыбайлас жемқорлыққа қарсы комплаенс-қызметтер институтын құру бекітілді. Қазіргі уақытта Сыбайлас жемқорлыққа қарсы саясаттың 2022-2026 жылдарға арналған тұжырымдамасы шеңберінде комплаенс-қызметтер жұмысындағы сыбайлас жемқорлыққа қарсы қызметтің үйлестіруші рөлін күшейту көзделген. Осы тұрғыда квазимемлекеттік сектор өкілдерін компаниялар мен олардың қызметкерлерінің қызметінде сыбайлас жемқорлық көріністеріне жол бермеу бойынша барлық қажетті шараларды қабылдауға шақырғым келеді», – деді Д.Каконов.
Кеңесте қатысушыларға сыбайлас жемқорлыққа қарсы комплаенс жүйесінің теориялық және практикалық аспектілері егжей-тегжейлі түсіндірілді, сондай-ақ квазимемлекеттік сектор саласында сыбайлас жемқорлық тәуекелдеріне ішкі талдау жүргізу бойынша әдістемелік ұсынымдар берілді.
Айта кетейік, бүгінгі күні 320-дан астам квазимемлекеттік сектор ұйымдарында комплаенс бойынша мамандар тағайындалды, олардың міндеті – құқық бұзушылықтардың алдын алу, корпоративтік адалдық стандарттарын сақтау және ұйымның іскерлік имиджін қорғау.
Комплаенс бойынша жауапты қызметкерлер үшін оқыту тренингтері өткізіледі, өз кезегінде комплаенс-қызметтер ұйымдарда жүргізілетін сыбайлас жемқорлықтың алдын алу жөніндегі жұмыс туралы ақпаратты тоқсан сайын ұсынады.
