Есіл ауданының прокуратурасы күрделі жөндеу жұмыстары жүргізілген мектепті тексеру кезінде орындалған жұмыстардың актілеріне заңсыз қол қойылғанын және сол үшін бюджет қаражатынан жалпы сомасы 27 млн теңгеден астам ақы төленгенін анықтады.
Ақмола облысы прокуратурасы баспасөз қызметінің мәліметінше, мердігер жасасқан келісім-шарттың талаптарын орындамаған, терезе орнату, мектеп шатырын жабу сияқты бірқатар жұмыстардың көлемі орындалмай қалған. Соның салдарынан мектептің күрделі жөндеу жұмыстары белгіленген мерзімде аяқталмады.
«Прокурорлық ден қою шараларымен мердігер ұйым мемлекеттік сатып алудың жосықсыз қатысушысы болып танылды. Құрылыс-монтаждау жұмыстарын орындамағаны үшін 1 380 000 теңге көлемінде айыппұл салу және лицензиясынан айыру түрінде әкімшілік жазаға тартылды. Сонымен бірге, лауазымды тұлғалар да тәртіптік жауапқа тартылды. Қабылданған шаралардың нәтижесінде нысанда жөндеу жұмыстары қарқынын жоғалтқан жоқ», — деді ведомстводан.
