Шоқан Уәлиханов атындағы Көкшетау университетінде Парасаттылық мектебі жұмыс істей бастады.
Іс-шара барысында Сыбайлас жемқорлыққа қарсы іс-қимыл аумақтық департаменті басшысының бірінші орынбасары Айдос Жақиялин парасаттылық курстары тұлғаның берік адамгершілік негізі және сыбайлас жемқорлыққа қарсы мінез — құлықтың тұрақты дағдылары бар өскелең ұрпақты тәрбиелеу шеңберінде жақсы плацдарм болуы тиіс екенін атап өтті.
«Жастарға үлкен үміт пен жауапкершілік жүктеледі, өйткені ол аға буынның мұрагері болып, мемлекеттің одан әрі дамуы мен өркендеуін қамтамасыз етуі тиіс. Сондықтан сыбайлас жемқорлыққа қарсы мәдениет пен академиялық адалдықты қалыптастыруға белсенді қатысатын жас балаларды көру қуантады. Парасаттылық мектебінде оқу барысында алған біліміңіз бен дағдыларыңыз болашақ өмірде міндетті түрде пайдаланылатынына сенемін», — деді Айдос Жақиялин.
Сондай-ақ, облыстың Антикор басшысының бірінші орынбасары сыбайлас жемқорлыққа қарсы мінез-құлықты дамыту және адамгершілік құндылықтардың өзгеруі мәселелері ағымдағы жылғы ақпанда Мемлекет басшысы бекіткен Сыбайлас жемқорлыққа қарсы саясаттың 2022-2026 жылдарға арналған тұжырымдамасында жеке блокпен көрініс тапқанын атап өтті.
Университеттің проректоры Айгүл Жақыпова студенттерге Парасаттылық мектебінде оқу бағдарламасы туралы айтып берді.
«Мектепте оқушылар сыбайлас жемқорлықты зерттеудің теориялық негіздерін, сыбайлас жемқорлыққа қарсы саясаттың өзекті бағыттарын, сондай-ақ сыбайлас жемқорлыққа қарсы заңнаманың маңызды жаңашылдықтарын біле алады. Дәріскерлер ретінде ЖОО оқытушылары, аймақтың Сыбайлас жемқорлыққа қарсы ведомствосының және Мемлекеттік басқару академиясы филиалының өкілдері қатысады. Биылғы парасаттылық курстарының ерекшелігі — бұл тек оқу орнының студенттері ғана емес, олардың ата-аналары да қатыса алады. Ал курс аяқталғаннан кейін арнайы сертификаттар беріледі», — деді спикер.
