Бүгін Қазақстанның мәдени астанасы аясында Қызылорда облыстық тарихи-өлкетану музейі Көкшетау қаласына музей қорындағы зергерлік бұйымдар коллекциясынан «Зергерлік бұйымдар – ұлт жақұты» атты этнографиялық-танымдық көрмесін ұйымдастырды.

Қазақ ұлтының зергерлік өнері, ою-өрнегі – ғасырлар қолтаңбасы, ата-бабалар тіршілігінің куәгері, солардан қалған өшпес мирас, өлмес мұрасы. Ерекше қасиет дарыған Сыр бойы халқының ішінде асылдың сынығы, тектінің тұяғы зерделі зергерлер көп болған.

Көрмеге сырдариялық елге белгілі зергер Мизам Төлегеновтің, Арал топырығанын шыққан атақты зергер Құдайберген Құлманбетовтің, шиелілік зергер-ұста Бекзат Жақыповтың туындылары және Сыр халқы арасында жинақталған зергерлік бұйымдары орналастырылды.

Этнографиялық-танымдық көрме Сыр елі нақышында жасалған, жасалу техникасында өзіндік ерекшелігі бар қазақ халқының гигиеналық бұйымдары, той-думандарда тағынған салтанатты әшекейлерді, күнделікті тұрмыста қолданған зергерлік бұйымдарды қамтиды.

Көрмеде ұсынылған зергерлік бұйымдар ХIХ ғасырдың аяғы мен ХХ ғасырдың басымен мерзімделеді, басты материалы — күміс, пайдаланған асыл тастары – ақық (сердолик), көгілдір ақық (бирюза), коралл (маржан), жемчуг (інжу), шыны. Сыр өңірінің зергерлік бұйымдарын жасау технологиясы — қаралау, шекіме, сымкәптеу, безеу, нүктелеу т.б.

Көрмеде музей қорындағы зергерлік бұйымдармен қатар қазақ аруларының ұлттық болмысы бейнеленген кенепке түскен фотокартиналар орын алған.

Ақмола облысы мәдениет басқармасының басшысы Айгүл Сәбитова қасиетті Сыр елінен арнайы келген қонақтарымызға алғысын білдіріп, шығармашылық табыстар тіледі.