Көкшетаудың қай бұрышына барсаң да, шашылып жатқан қоқысты көресін. Көше бойы да, көпқабатты тұрғын үйлердің ауласы да, жеке сектор айналасы да қоқысқа толы. Тау болып үйілген қоқысты көргенде иесіз қала ма деп қаласын.
Қала басшылығы мұны тарифтің төмендігі және тұрғындардың тазалыққа қырын қарауымен байланыстырады. Әйтсе де, қаланың орталығында жаңа салынған тұрғын үйлердің тау болып үйілген қоқыс пен адам бойынан асатын қамыстың қоршауында қалып отырағанын ешкім жоққа шығара алмайды.
Көкшетаулықтар бұған қала тазалығына жауапты коммуналдық кәсіпорын да, қала тұрғындары да кінәлі емес екенін айтуда. Редакциямызға хат жазған Центральный шағынауданы тұрғындарының айтуынша, қаланың ластануына қала басшылығының жауапсыздығы, жұмысқа деген салғырттығы себеп болып отырған көрінеді.
«Осыдан бірер жыл бұрын «Собачий хутор» арқылы өтетін Ғабдуллин көшесі «Шах» дәмханасы тұсынан Абылай хан көшесін қиып, Центральный шағынауданы арқылы Жансая тұрғын үй кешеніне дейін жалғасады деген еді. Содан бері біраз жылдың жүзі болды, әлі көшенің салынатын түрі. Керісінше, көше салынатын аумақты қаланың құрылыс компаниялары қоқыс алаңына айналдарып жіберді. Осының салдарынан еріген қар мен жаңбырдың суы өзінің табиғи ағысын жоғалтып, тұрғын үйлердің ауласына жиналуда. Бұл әрине, тұрғындардың жүріп, тұруына үлкен кедергі келтіріп отыр. Екінші жағынан қалаға экологиялық қауп төндіруде. Жаздыгүні қоқыстың арасынан шығатын жағымсыз иістің қолқаны қапқаны бір бөлек, үйдің ауласына дейін қуалап өскен, адам бойынан асатын құрғақ қамыс өртенсе түтінге тұншығамыз», — дейді Центральный шағынауданының тұрғыны Бауыржан Әлібек.
PS: Көкшетаудың орталығын осылай күл — қоқыс төгетін орынға айдалдыру әрине, қала әкімі Бауыржан Ғайсаға үлкен сын. Көзге түрпідей тиіп, қала тұрғындарына қолайсыздық келтіріп отырған осы мәселені облыс және қала басшылығы тез арада шешеді деп үміттенеміз.
