Қазақстан Республикасы Мемлекеттік қызмет істері агенттігінің Ақмола облысы бойынша департаментімен (бұдан әрі – Департамент) 2023 жылдың және 2024 жылдың бірінші тоқсанының қорытындылары бойынша жергілікті атқарушы органдардың (бұдан әрі-ЖАО) мемлекеттік қызметшілеріне сыйлықақы беру практикасына талдау жүргізілді.
Мемлекеттiк бюджет қаражаты есебінен Қазақстан Республикасы органдарының қызметкерлеріне сыйлықақы беру, материалдық көмек көрсету және лауазымдық жалақыларына үстемеақылар белгілеу, сондай-ақ мемлекеттік әкімшілік қызметшілерге бонустар төлеу қағидаларын бекіту туралы (Қазақстан Республикасы Үкіметінің 2001.08.29 № 1127 қаулысымен бекітілген)қағидалардың 4-тармағына сәйкес қызметкерге сыйлықақы берілмейді:
1) оның алынбаған тәртіптік жазасы болған кезде;
2) тиісті органда бір айдан кем жұмыс істеген болса;
3) сынақ мерзімінен өту кезеңінде сыйлық берілмейді.
Департаментпен жүргізілген талдау қорытындысы бойынша 2023 жылы жалпы сомасы 1 839 747 теңгеге сыйлықақыларды заңсыз төлеудің 15 фактісі анықталды, атап айтқанда, алынбаған тәртіптік жаза болған жағдайда 853 262 теңгеге 6 қызметкерге сыйлықақы берілді, 8 қызметкерге сынақ мерзімінен өту кезеңінде 871 485 теңге сомасына сыйлықақы, 1 айдан аз жұмыс істеген қызметкерге 115 000 теңге сыйлықақы берілді.
Мысалы, Сабынды ауылдық округінің әкімі мен Қызылсай ауылдық округінің әкімі алынбаған тәртіптік жазаның болуына қарамастан өзінің сыйлықақылары туралы өкімдер шығарғаны анықталды.
Қағидалардың 4-тармағының 2-тармақшасының талаптарын бұза отырып, Ақмола облысы Экономика және бюджеттік жоспарлау басқармасының экономикалық саясат және жоспарлау бөлімінің бас маманы мемлекеттік органда бір айдан аз жұмыс істегеніне қарамастан 2024 жылғы 15 наурыздағы бұйрығымен сыйлықақы алды.
Департамент анықталған бұзушылықтарды ескере отырып, мемлекеттік органдардың атына заңсыз төленген бюджет қаражатын қайтаруды қамтамасыз ету жөнінде шаралар қабылдау қажеттігі туралы хаттар енгізді.
Департамент осындай бұзушылықтарды бұдан әрі болдырмау мақсатында аудан (қала) әкімдерінің аппарат басшыларына, мемлекеттік органдар басшыларының орынбасарларына және мемлекеттік органдардың әдеп жөніндегі уәкілдеріне семинар өткізілді.
