Санаулы күндерден кейін күллі мұсылман үшін қасиетті мереке Рамазан айы басталады. Айлардың сұлтаны саналатын Рамазанның алғашқы күні, яғни Ораза 2 сәуірде басталып, мамырдың 1 дейін жалғасады. Осы аралықта мұсылман баласы 30 күн бойы ауыз бекітіп, жан басына пітір садақа таратуы тиіс. Ал мың түнге пара-пар Исламдағы қасиетті түндердің бірі — Ләйләтүл-Қадір түні 27 сәуірден 28 сәуірге қараған түні келеді.
ҚМДБ-ның Ақмола облыстық Науан хазірет мешітінің бас имамы Қуаныш Сәбит осы айда жергілікті мешіттермен атқарылатын іс шаралар жайлы баяндады, деп хабарлайды өңірлік коммуникациялар қызметі.
Бұл ай – кешірім айы. Әр адам кешірім мен тақуалыққа көбірек назар аударғаны жөн. Таң намазынан ақшам намазына дейін ауыз бекітіп, дұға тілеудің маңызы зор.
Ізгілік айында қайырымдылыққа көбірек көңіл бөлініп, барлық мешіттерде арнайы ауызашарлар берілетін болады.
Бұдан басқа қасиетті айдың тағылымын арттыратын діни шаралар да ұйымдастырылады. Мұсылман адамның бет-бейнесін жақсы қырынан сипаттайтын уағыздық кездесулер де өткізілмекші.
Облыстың бас имамының айтуынша рамазан айын сипаттайтын баннерлер де ілініп, мешіттерде ораза ұстаудың тәртібі мен кестесі жазылған парақшалар да таратылу үстінде. Ораза ұстаудың жай-жапсарын білгісі келгендерге мешіттерде арнайы ақыл-кеңес беріледі.
«Шынайы тәубе ету – күнәнің кешірілуіне себеп болады. Осы айда біз өзімізге нығмет еткен ғибадаттардан айрылып қалмайық. Шынайы құлшыныспен Аллаға құлшылық етіп, оразамызды ұстап, көп дұғалар жасайық. Біз оразаны кім үшін ұстаймыз. Алла тағаланың сыйына кенелу үшін жасаймыз ғой. Мұсылман үшін екі қуаныштың бірі осы айдың тағылымына жазылған. Ауызашар кездегі қуаныш осылардың ең абзалының бірі екені айтылады», — деп атап өтті Қуаныш Сәбит.
Айта кетейік, биыл пітір садақа 500 теңге болып белгіленді. Оның құны 2 келі ұнның нарықтағы бағасымен теңестірілді. Еліміздің барлық өңірлері бойынша ұнның бағасы сұралып, анықталды. Пітір садақа беруге келсек, оны Ораза басталған күннен бастап, 30 күннің ішінде өтеген жөн.
