Ақмола облысы бойынша Сыбайлас жемқорлыққа қарсы іс-қимыл департаменті облыстың Қылмыстық-атқару жүйесі департаментімен бірлесіп мемлекеттік қызметшілер үшін Гранитный кентінің түзеу колониясына профилактикалық экскурсия ұйымдастырды.
Қылмыстық-атқару мекемелеріне экскурсияларды ұйымдастырудың негізгі мақсаты – мемлекеттік қызметшілер мен квазимемлекеттік сектор өкілдерінің санасына сыбайлас жемқорлық әрекеттердің салдары туралы әсер ету, сондай-ақ сыбайлас жемқорлыққа қарсы көзқарасты қалыптастыру.
Мәдениет басқармасының қызметкерлері, сондай-ақ аймақтағы мұражайлар, театрлар және кітапханалардың директорлары ЕЦ-166/25 мекемесінің сотталғандарын ұстау шарттарымен егжей-тегжейлі таныстырды.
Шенеуніктер сотталғандарға арналған жатақханалар, асхана, медициналық бөлім, серуендеуге арналған алаң орналасқан тұрғын аймаққа барды. Мекеменің асханасында қамаудағыларға арналған ас мәзірі көрсетілді.
Сондай-ақ, мемлекеттік қызметшілер «өнеркәсіптік аймаққа» барды, онда сотталғандар жиһаз, ағаш және тігін цехтарында жұмыс істейді.
Сонымен қатар, іс-шараға қатысушылардың алдында сыбайлас жемқорлық үшін сотталған, өз уақытында басшылық қызмет атқарған облыстың бұрынғы мемлекеттік қызметшісі өкініш сөз сөйледі.
Облыстық Сыбайлас жемқорлыққа қарсы қызмет басшысының бірінші орынбасары Айдос Жақиялин мәдениет саласы қызметкерлерінің қатысуымен ұйымдастырылған іс-шараның кездейсоқ ұйымдастырылмағанын атап өтті.
«Профилактикалық экскурсиялар мемлекеттік қызмет және квазимемлекеттік сектор қызметкерлері үшін құқықтық статистика мәліметтерін, қабылданған сот үкімдерін, сондай-ақ сыбайлас жемқорлық тәуекелдерін талдау қорытындыларын ескере отырып жүргізіледі. Соңғы бірнеше жылдың ішінде мәдениет саласының 6 басшы лауазымды тұлғасына қатысты 9 қылмыстық іс өңірдің Сыбайлас жемқорлыққа қарсы қызметінің өндірісінде болды. Сондықтан, біз мемлекеттік қызметшілерге сыбайлас жемқорлық әрекеттерінің салдарын көрнекі түрде көрсеттік. Мұндай тәжірибені түрлі сала қызметкерлерін тарта отырып, тұрақты негізде қолдану жоспарланып отыр», – деді Айдос Жақиялин.
Айта кету керек, түзеу мекемесінің қабырғасындағы сотталғандардың өмірімен танысу мәдени қызметкерлерді таң қалдырды, өйткені ешкім темір торға қамалғысы келмейді.
