Ақмола облысы бойынша Сыбайлас жемқорлыққа қарсы қызмет департаменті өңірдің жеке кәсіпкерлерінен берешекті өндіріп алу туралы негізсіз салықтық бұйрықтар шығаруды анықтады.
Мониторинг барысында мемлекеттік кірістер органдары 14 жеке кәсіпкерге қатысты салықтар бойынша берешекті өтеу талап етілген салық бұйрықтарын шығарғаны анықталды. Бұйрықтардың негізінде сот орындаушылары атқарушылық іс жүргізуді қозғаған.
Салық кодексіне сәйкес (128-бап) мұндай бұйрықтар жеке кәсіпкер болып табылмайтын немесе жеке практикамен айналыспайтын жеке тұлғаларға шығарылуы мүмкін.
Салық қызметкерлерінің айтуынша, бұл жағдайдың себебі ақпараттық жүйенің жетілмегендігі болды. Жүйе автоматты түрде жеке тұлға ретінде емес, жеке кәсіпкер ретінде берешек туралы хабарламалар мен салықтық бұйрықтар шығаратыны белгілі болды.
Департамент уәкілетті органдарға тиісті ұсынымдар жолдағаннан кейін 14 кәсіпкерге қатысты негізсіз шығарылған салық бұйрықтары жойылды, ал атқарушылық іс жүргізу тоқтатылды.
Сонымен қатар, бүгінгі таңда Мемлекеттік кірістер комитеті ақпараттық жүйенің кемшіліктерін жойып, енді кәсіпкерлерге салық бұйрықтары шығарылмайтын болды.
