Бүгін ҚР Мемлекеттік қызмет істері агенттігінің Ақмола облысы бойынша департаментінің басшысы Думан Әбілев Абай Мырзахметов атындағы Көкшетау университетінің студенттерімен кездесті.

Іс-шара барысында спикер студенттерді мемлекеттік қызмет саласындағы қолданыстағы заңнамаға енгізілген өзгерістермен таныстырып, мемлекеттік қызметке конкурстық және конкурстан тыс іріктеу тәртібі туралы баяндады, сондай-ақ мемлекеттік қызметке кіруді жеңілдету мақсатында бекітілген іріктеудің уақытша қағидалары туралы толығырақ ақпарат берді.

Атап айтқанда Ақмола облысының жергілікті атқарушы органдарында мемлекеттік қызметке іріктеу уақытша қағидалар негізінде іске асырылады.

Мұнда барлық процесстер автоматтандырылған, яғни Еқызмет интернет-платформасы арқылы іске асырылады. Кандидаттар іріктеуге қатысу үшін құжат жинаудан босатылды. Барлық құжаттар кандидаттардың электрондық жеке істеріне басқа жүйелерден жинақталады. Сонымен қатар қолданыстағы заңнаманы білуіне тестілеу 4 заңнаманы қамтитын 1 ғана бағдарлама бойынша іске асырылады.

Жалпы мемлекеттік тілді және қолданыстағы заңнаманы білуіне тестілеуден өту, бос лауазымдар туралы хабарландырулармен танысу, конкурсқа қатысуға өтінім беру, жеке қасиеттерін бағалау, сонымен қатар сандық және мәтіндік ақпаратпен жұмыс істеу қабілеттерін бағалау бойынша тестілеуден өту, эссе жазу, әңгімелесуге қатысу — осы кезеңдердің барлығы бір платформада іске асырылады.

Бұл өзгерістер мемлекеттік қызметтің заманға сай мобильділігін арттырып, жастардың кадрлық әлеуетін тиімді қолдануға мүмкіндік береді.

Іс-шара соңында студенттермен пікір алмасу ұйымдастырылып, спикер олардың қызықтырған сұрақтарына жауап берді.