Облыс әкімдігінің алаңында өткен кездесуде жергілікті атқарушы органдардың әдеп жөніндегі уәкілдеріне Сыбайлас жемқорлыққа қарсы саясаттың 2022-2026 жылдарға арналған тұжырымдамасының басты ережелері түсіндірілді.
Департаменттің превенция басқармасы басшысының орынбасары Абай Жаналинов аудандар мен қалалар әкімдері аппараттарының басшыларын сыбайлас жемқорлыққа қарсы іс-қимыл мәселелері бойынша заңнамадағы соңғы новеллаларды туралы, оның ішінде цифрлық теңгенің көмегімен бюджет қаражатын игеру процестерінде ақшаны таңбалау және қадағалау тетігін енгізу туралы хабардар етті. Айта кетсек, облыстық Антикор «KOKSHE» әлеуметтік-кәсіпкерлік корпорациясында бюджет қаражатын игеру үдерістерінде «ақшаны бояу» тетігін енгізу мәселесін пысықтауда.
Сондай-ақ, қатысушыларға өңірдің Сыбайлас жемқорлық тәуекелдері картасының бағыттары, «Бизнеске жол» және «Сыбайлас жемқорлыққа қарсы волонтерлік» жобалары туралы айтып берілді.
Бұдан басқа, спикер «ТБН-4» жобалық басқару шеңберінде сыбайлас жемқорлық тәуекелдеріне ішкі талдауды сапалы жүргізуді қамтамасыз ету қажеттігін атап өтті.
Облыс әкімі аппаратының әдеп жөніндегі уәкілі Айнагүл Жанәділова мен Мемлекеттік қызмет істері департаментінің өкілдері мемлекеттік қызметшілердің этикалық нормалар мен сыбайлас жемқорлыққа қарсы заңнаманы сақтауы бойынша қабылданып жатқан шаралар туралы баяндама жасады.
