ҚР Мемлекеттік қызмет істері агенттігінің Ақмола облысы бойынша департаментінің басшысы Думан Әбілев Өңірлік коммуникациялар қызметі алаңындағы брифинг барысында Департаменттің 2022 жылы атқарған жұмыс нәтижелерімен таныстырды. Оның айтуынша, мемлекеттік аппараттың кадрлық жай-күйіне жүргізілген мониторинг мемлекеттік қызметшілердің сапалық құрамының жақсарғанын көрсетіп отыр.
Мониторинг нәтижесіне сәйкес облыстың мемлекеттік органдарында 4,5 мыңнан астам мемлекеттік қызметші жұмыс істейді. Жыл сайын жоғары кәсіби білімі бар мамандар саны өсуде: мемлекеттік қызметшілердің 89,3% жоғары білімді, оның ішінде 18,3% екі не одан артық жоғары білімі бар мамандар, олардың ішінде ғылым кандидаттары, «Болашақ» бағдарламасының, Қазақстан Республикасы Президентінің жанындағы Мемлекеттік басқару академиясының түлектері, жоғары оқу орнынан кейінгі және шетелдік білім иегерлері еңбек етуде.
Гендерлік саясат сәтті іске асырылуда – қызметшілердің 66,7% әйелдер, оның ішінде 21% басшылық лауазымдарды иеленуде: облыстық басқарма басшылары арасында – 10,5%, қалалар мен аудандар әкімдерінің орынбасарлары – 23,9%, дербес бөлім басшылары – 48,6%, ауыл әкімдері-17,8%.
Қызметшілердің мансаптық ілгерілеуі оң серпінге ие: ішкі конкурстардың қорытындысы бойынша жергілікті атқарушы органдарда 104 қызметші тағайындалды, олардың 72,1% жоғары тұрған лауазымдарға тағайындалды.
Айта кету керек, мемлекеттік қызметшілер арасындағы жастар саны 16,9% құрайды. Сондықтан мемлекеттік қызметшілер қатарына жас мамандарды тартуға ерекше көңіл бөлінеді. Осы бағытта «Talapker» жас мемлекеттік қызметшілер мектебі» жобасы іске асырылуда. Бұл мектептің миссиясы жоғары оқу орындарының соңғы курс студенттері қатарынан мемлекеттік қызмет үшін жоғары білікті, құзыретті кадрларды даярлау болып табылады.
Облыстың жастар-ресурстық орталығымен жасалған өзара ынтымақтастық туралы меморандум шеңберінде бос орындар жәрмеңкелері, кеңес сағаттары, жастармен кездесулер, имидждік және зияткерлік іс-шаралар, ашық есік күндері, «Мемлекеттік қызметтегі бір күн» акциялары өткізіледі.
