Білім беру саласында сыбайлас жемқорлықтың алдын алу аясында Ақмола облысы бойынша Сыбайлас жемқорлыққа қарсы іс-қимыл департаментінің басшысы Мұрат Төлеубаев Қазақстан Республикасы Төтенше жағдайлар министрлігі Көкшетау техникалық институтының басшылығымен, оқытушылар құрамымен және курсанттарымен кездесу өткізді.
Кездесу барысында Мұрат Төлеубаев қатысушыларға сыбайлас жемқорлыққа қарсы маңызды заңнамалық өзгерістерді түсіндіріп, сыбайлас жемқорлық құқық бұзушылықтар үшін жауапкершіліктің қатаңдатылғанын атап өтті. Сондай-ақ, ол өз сөзінде болашақ өрт сөндіруші-құтқарушыларды сатылмаушылыққа, адал және парасатты қызмет етуге шақырды.
«Парасаттылық пен академиялық адалдық оқушыларға білім беретін адамдар үшін де, жастарға да мінез-құлық нормасы болуы керек. Төтенше жағдайларға тап болған адамдардың өмірі құтқарушылардың кәсібилігі мен адамгершілік қасиеттеріне байланысты. Сіздер жауапты қызмет атқарасыздар, сондықтан өз еліңіздің лайықты азаматы болуға шақырамын», – деді ол.
Сыбайлас жемқорлыққа қарсы бағыттағы әлеуметтік бейнероликтерді көрсету барысында кездесуге қатысушылар сыбайлас жемқорлықтың жағымсыз салдарын кезекті рет көрді.
Сондай-ақ, өңірдің сыбайлас жемқорлыққа қарсы ведомствосының басшысы жоғары оқу орнының зертханаларымен, оқу кабинеттерімен және мұражайымен танысты. Сонымен қатар, оған оқытуға арналған авариялық-құтқару техникасы мен жабдықтары ұсынылды.
Студенттік ортада сыбайлас жемқорлыққа қарсы көзқарасты қалыптастыру мақсатында Көкшетау техникалық институтында, өңірдің барлық жоғары оқу орындарындағыдай, «Саналы ұрпақ» ерікті клубы жұмыс істейді, оның аясында облыстық Сыбайлас жемқорлыққа қарсы қызмет пен Институт өкілдерінің қатысуымен жүйелі түрде түрлі іс-шаралар өткізіледі.
