Облыстық ішкі саясат басқармасының мәліметінше, «Хан Шатыр» сауда-ойын-сауық кешенінің жанындағы алаңда өтіп жатқан жәрмеңкеде өңірдің ауыл шаруашылығы тауар өндірушілері 420 миллион теңгеге жуық сомаға 500 тоннадан астам өнімін ұсынуда.

Нұр-Сұлтан қаласының тұрғындары мен қонақтары 50-ден астам азық-түлік өнімдерін нарық бағасынан 10-20 пайызға төмен бағамен сатып алуда. Мысалы, сиыр еті 2000 теңгеден, жұмыртқа 43 теңгеден, картоп 140 теңгеден сатылуда.

Ақмолалық шаруалар жәрмеңкеге барлығы 123 тонна ет және шұжық өнімдерін, 50 тонна сүт және сүт өнімдерін, 8 тонна жаңа балық, 394 мың дана жұмыртқа, 13 тоннадан астам ұн, 164 тонна картоп, 54 тонна көкөніс, 3 тоннадан астам кондитерлік және нан-тоқаш өнімдерін және 3 тонна басқа бакалея өнімдерін әкелді.

Ақмола облысы әкімінің орынбасары Ғалымжан Әбдіқалықовтың айтуынша, елорда тұрғындары үшін өңірдің өнімі таныс.

«Біздің тауар өндірушілер елорда нарығына өз өнімдерін тұрақты түрде жеткізіп тұрады. Олардың арасында сұраныс жоғары «Гормолзавод» ЖШС және «Родина» ЖШС сүт өнімдері, «Бижан» ЖШС шұжық өнімдері бар. Сондықтан, таңертең жәрмеңкеде халық қарасы көп болды», — деді Ғалымжан Әбдіқалықов.

Айта кетейік, іс-шара санитарлық нормаларды сақтай отырып өтуде.
Жәрмеңкеге тұрақты келуші Виталий Казанцев қалаған сүйікті тауарын тиімді бағамен сатып алу үшін жәрмеңкеге ерте келген.

«Ақмола облысының өнімі қайталанбас дәмімен танымал. Жыл сайын мен міндетті түрде ет пен май сатып аламын. Бүгін әдейі ерте келдім. Азық-түліктің сапасына өте ризамыз», — деп бөлісті тұрғын.

Айта кетейік, өңірдің ауыл шаруашылығы тауар өндірушілері елорда нарығына азық-түлікті үздіксіз жеткізіп келеді. Қала тұрғындарының ет пен сүтке деген сұранысы үштен бірге, жұмыртқа бойынша 90 пайызға қамтамасыз етіледі. Жыл басынан бері елорда нарығына шамамен 100 мың тонна сүт өнімдері, 23, 5 мың тонна ет өнімдері, 202 миллион дана жұмыртқа жеткізілді.

Елордада AQMOL мамандандырылған дүкендері жұмыс істейді, онда ақмолалық тауар өндірушілердің өнімдерінің бағасы басқа дүкендерге қарағанда 10-30 пайызға төмен.
Ақмола облысы елордадағы өңірлік жәрмеңкелер циклін аяқтайды.