Бұл туралы әлеуметтік желілерде тұрғындар түсірген бейнежазба тарады. Бейнежазба авторының айтуынша, Көкшетау қаласындағы Назарбаев және Жүнісов көшелерінің қиылысында орналасқан көпқабатты тұрғын үйлерге жоғары вольтты электр сымдары аулада өсіп тұрған ағаштар арқылы тартылған. Тіпті, кейбір тұстарында сымдардың төмен салбырап тұрғаны соншалықты ересек адам қолмен ұстай алады.
«Бұл Назарбаев 8 және Жүнісов 12 мекенжайы бойынша орналасқан тұрғын үйлер. Бұл үйлерге электр кабельдері тартылған. Яғни, жоғары вольті кабель бағандар арқылы емес, ағаштарға сыммен байлап тартылған. Созған адамның қолы жетеді», – дейді бейнежазба авторы.
Осы ретте, желі қолданушылар аулада ойнап жүрген балалардың қаупсіздігі үшін алаңдауда. Сонымен бірге мұндай жағдай қаланың өзге тұрғын үй аулаларында барын айтуда.
