Биылғы жылдың қараша айында өткізу жоспарланып отырған «Қазақстан-Ресей» ынтымақтастық форумы қарсаңында Көкшетау қаласында әлеуметтік нысандар бой көтеріп, инженерлік коммуникация, қалаішілік жолдардың ескісі жаңартылып, жаңасы салынуда. Әсіресе, «Көктем» шағын ауданында жүргізіліп жатқан жөндеу жұмыстары қала тұрғындарының көңілінен шығады.

«Васильковка» мен «Көктем» шағын аудандарының ортасынан өтіп, «Сарыарқа» шағын ауданына апаратын күре жол жаңадан төселіп жатыр. Мұнда жаяулар мен велосипед жолдары қарастырылған. Бұл жердегі құрылыс жұмыстары мен сәулет жобасы көрген адамның көзі сүйсіндіреді. Тек, бір әттегені-ай, ол осы жаңарған көшенің сәнін бұзып тұрған  «Аида» дүкені дер едік. Тұрғындар жүріп тұруға кедергі әрі көзге күйік дүкеннің жолдың қақ ортасында тұрғанына наразылық білдіруде.

«Бұл жерде «Девчата» асханасы мен дүкені болды. Жолдың ортасында тұрғандықтан асхана тұрғындардың жүріп тұруына кедергі келтірді. Жаңа жол салатын болған соң оны бұзып алып тастады.  Ойлаған едік, е дұрыс болды деп. Алайда, жол салынған соң бұл жерге қайтадан «Аида» дүкені ашылды. Тура велосипед жолының бойында. Мүлдем ыңайсыз, әрі көшенің сәнін кетіріп тұр. Сондықтан, қала басшылығы бұл дүкенді басқа жерге көшірсе екен»,  — дейді қала тұрғындары.

Автор: Боранбай КӨМЕКЕЙ.