Көкшетау қаласының орталығындағы Центральный шағынауданы тұрғындарының қала әкіміне өкпесі қара-қазандай.
Редакциямызға хат жазған тұрғындардың айтуынша, қала әкімінен бастап, барлық салалық бөлімдердің басшыларын көкшетаулықтардың жайлы тұрмысы мен түйіткілді мәселесі қызықтырмайды, тек астындағы креслосы мен қалың қалтасы үшін ғана үшін жұмыс істейді.
Центральный шағынауданда Абылай хан көшесі мен Ғабдуллин көшелерінің қилысар тұсынан «Шах» дәмханасы арқылы өтетін қара жол бар. Бұл қара жол сол маңда жаңадан салынған бес қабатты Центральный 24А және 24Б екі тұрғын үй арқылы Жансая тұрғын үй кешеніне апарады. Апарады деген жәй құрғақ сөз ғана, толарсақтан саз кешіп, сорлап барасын.
Бұл жолдан шалғайдағы ауылдың қара жолы анғұрлым артық көрінеді. Ойдым-ойдым болып тұрған бұл жолдан жаяу адам түгілі танк өте алмайды.
Жердің ойылып қалғандығы соншалықты жеңіл көліктердің асты тіреліп, бампері жұлынып түседі. Қаланың орталығы болса да, таксилер бұл жерге мүлдем жоламайды. Ал, жаяулар болса, абайлап жүрмесе, сүрініп құлап әлек.
«Ашыңғандықтан бұлай қатты айтып отырмын. Қаланың қақ ортасы деген аты ғана. Күн сайын әуеден жаңбырша ракета құлап жатқан Украина қалаларынан еш айырмашылығымыз жоқ. Соғыс кезіндегідей өмір сүріп жатырмыз. Үйге кіріп, шығар көшеміздің сау-тамтығы жоқ, тап бір снаряд түскендей. Жолдың үстінен танк жүріп өткендей, ойық шұңқырлар жеңіл машинаның есігінен келеді. Жолдың шеті тау тау болып үйілген күл-қоқыс, адам бойынан асатын қамыс. Темір тұлпарымыздың түбін қырып, әбден сындырып бітіретін болдық. Апта сайын станцияға барып жөндетеміз. Осыны бір ретке келтіретін адам жоқ па? Миллиондап айлық алып отырған әкім қайда, оны тыңдайтын салалық бөлім басшылары мен мамандары қайда?», – дейді қала тұрғыны Гүлбаршын Қасенова.
Айта кетсек, бұған дейін Центральный шағынауданында, Абылай хан көшесі мен Ғабдуллин көшелерінің түйісер тұсынан бастап, ескі зират пен Жансая тұрғын үй кешені аралығын қалың қамыс басып кеткенін жазған едік. Қалалық тұрғын үй коммуналдық шаруашылық бөлімі бұл мәселені шешеміз деген еді. Содан бері екі ай өтті, еш нәтиже жоқ.
