Ақмола облысының әкімі Марат Ахметжановтың төрағалығымен өткен Щучье-Бурабай курорттық аймағын дамыту мәселелері жөніндегі жұмыс кеңесіне ҚР Президенті Іс Басқармасының, туризм, экономика, көлік және экология салаларының өкілдері қатысты.
Іс-шара Мемлекет басшысы Қасым-Жомарт Тоқаевтың 2024 жылғы 13 маусымда туризмді дамыту жөніндегі кеңес барысында берген хаттамалық тапсырмаларын іске асыруға арналды.
Жиналғандардың назарында – курортты дамыту стратегиясына қатысты мәселелер ұсынылды: халықаралық нарықта ілгерілету үшін «Бурабай» курортының брендін құру, инфрақұрылымдық жобаларды қаржыландыру, туристік қызметтердің сапасын жақсарту.
«Біз курорттық аймақты дамытудың жаңа кешенді жоспарының негізін құрайтын тұжырымдамалық жаңа тәсіл мен нақты іс – қимылдарды бірлесіп әзірлеуіміз қажет», — деп атап өтті М.Ахметжанов.
Президенттің Іс басқарушысының орынбасары Рустам Баялиев Щучье-Бурабай курорттық аймағын дамыту бойынша мемлекеттік органдардың өзара іс-қимылы туралы айтты. ҚР Туризм және спорт вице-министрі Ержан Еркінбаев өңірдің туристік саласындағы ағымдағы және жоспарланған іс-шаралар туралы есеп берді.
Ақмола облысының туризм басқармасының басшысы Андрей Подгурский курорттық аймақты дамыту жоспарының үш кезеңі шеңберінде жүзеге асырылатын Бурабай кентінде инфрақұрылымдық желілерді жүргізу, су құбырлары мен жылу желілерін жаңғырту сияқты инженерлік инфрақұрылым жобаларының аяқталғаны туралы хабарлады.
Спикерлер сондай-ақ курорттық аймақтың көлік инфрақұрылымын дамыту және цифрлық технологияларды енгізу, туризм саласының инвестициялық әлеуеті, экологиялық тұрақтылық және қоғамдық жауапкершілік туралы айтты.
Кеңес соңында Щучье-Бурабай курорттық аймағының елдің жетекші туристік кластері ретіндегі позициясын одан әрі нығайтуға бағытталған жұмыс бағыттары айқындалды. Қорытынды құжат Бурабай курортын дамытудың кешенді жоспары болды.
