«Біздің елімізге көкірегі ояу, білімді, көзі ашық, ойы ұшқыр жастар керек» Қ.К.Тоқаев.
Ақмола облысы Ішкі саясат басқармасының «Қоғамдық даму орталығы» КММ-нің ұйымдастыруымен қаламыздағы колледж студент-жастары арасында «Тарихи таным» тақырыбында зияткерлік сайыс өтті.
Сайыстың мақсаты – жастардың ой-өрісін кеңейту, білімге деген құштарлығын арттыру, дарынды жастарды анықтау. Өз ойларын тез тұжырымдай білуге, жылдам, дұрыс шешім қабылдауға, топпен жұмыс істеуге дағдыландыру.
Дүбірлі додаға Ақмола облысы Ішкі саясат басқармасы басшысының орынбасары Жандаулет Қылышбаев, Қоғамдық даму орталығының басшысы Айдар Қожабаев және мекеме қызметкерлері, сондай-ақ Ж.Мусин атындағы Көкшетау жоғары қазақ педагогикалық колледжі, Ақан сері атындағы жоғары мәдениет колледжі, Азаматтық қорғаныс көпсалалы колледжі, Ш.Уәлиханов атындағы КУ жанындағы көпсалалы колледждің студенттері қатысты.
Басқарма басшысының орынбасары Жандаулет Төлепбергенұлы игі шараның шымылдығын ашып, елімізде жастардың білімді, қабылетті болуына Үкімет тарапынан барлық жағдайлар жасалып жатқандығын айтып, қатысушыларға сәттілік тіледі.
Зияткерлік сайыста студенттер өз бақтарын сынап, жақсы ойын көрсете білді.
Сайыс 3 кезеңді қамтыды:
I кезең – «Білім ринг» (ұяшық тандап, ұпай алу);
II кезең – «Ұшқыр ой» (ребус арқылы, мақал-мәтелдерді табу);
III кезең – «Көшбасшы» (берілген сөздерді, тобына жасыру).
Өз білімдерін ортаға салған студент-жастар бойларындағы қобалжу сезімін білдіртпеді. Барлығынан жеңіске деген талпынысты байқадық.
Озық ойлы жастар арасындағы сайыс қызықты әрі тартымды өтті. Қатысушылар барынша ұйымдасқан түрде белсенділік танытып, өз білімдері мен өнерлерін ортаға салды.
Сайыс соныңда Қазылар алқасы сайыскерлердің жұмыстарын бағалап, қорытындысын шығарды.
Нәтижесінде Ш.Уәлиханов атындағы КУ жанындағы көпсалалы колледждің намысын қорғап келген «Шоқан ұрпақтары» тобы 1 орынға лайық деп танылса, 2 орынды Ж.Мусин атындағы Көкшетау жоғары қазақ педагогикалық колледжінің «Мусин жастары» тобы, ал 3- орынды Ақан сері атындағы жоғары мәдениет колледжінің «Алаш» тобы өз қанжығасына байлады.
Ынталандыру номинациясы – Азаматтық қорғаныс көпсалалы колледжінің «Ұланымыз ұлы елдің» тобына бұйырды.
Тағылымды шара соңында сайыс жеңімпаздары сыйлықтармен және дипломдарымен арнайы марапатталды.
Қазылар алқасының төрағасы Алмат Нүкенов сайыс жеңімпаздарын құттықтап, жүрек жарды лебізін білдірді.
Осындай ел жастарына рух беретін әрі оларды елін, Отанын сүюге шақыратын мазмұны зор игі іс-шаралар «Қоғамдық даму орталығы» КММ тарапынан алдағы уақытта да жалғасын табады деген ойдамыз.
Бәсекеге қабілетті, ойлары жетік Егемен еліміздің жастарына әрдайым сәттілік тілейміз!
Айғаным Қайырбекова,«Қоғамдық даму орталығы» КММ маманы.
