Ақмола облысы бойынша сыбайлас жемқорлыққа қарсы іс-қимыл департаменті бюджет қаражатын ұтымсыз пайдалануды болдырмау және мемлекеттік сатып алу саласындағы сыбайлас жемқорлық тәуекелдерінің алдын алу мақсатында «Сатып алудың бірыңғай терезесі» веб-порталы арқылы мемлекеттік сатып алуларға мониторинг жүйелі түрде жүргізеді.
Жүргізілген мониторинг нәтижелері мемлекеттік органдар мен квазимемлекеттік сектордың сатып алынатын тауарларға, жұмыстар мен көрсетілетін қызметтерге бағаны негізсіз көтеру фактілерін көрсетті. Жыл басынан бері өңірдің Сыбайлас жемқорлыққа қарсы қызметінің енгізген ұсынымдарының арқасында 1 млрд теңге үнемделді.
Мәселен, «Оқжетпес» емдеу-сауықтыру кешені жалпы сомасы 42 млн теңгеге немесе 1 кг қой етін 4 200 теңгеге сатып алуды жоспарлаған. Ал нарықта еттің орташа бағасы анағұрлым төмен. Департаменттің уақтылы араласуының арқасында ұйым мемлекеттік сатып алу бағасын төмендетті. Нәтижесінде 20,8 млн теңге бюджет қаражаты үнемделді.
Сондай-ақ, ҚР Оқу-ағарту министрлігінің «Балдәурен» республикалық оқу-сауықтыру орталығы мемлекеттік сатып алу арқылы жалпы сомасы 14 млн теңгеге немесе 1 данасы үшін 14 000 теңгеге төсек-орын жабдықтары жиынтығын сатып алмақшы болған. Департамент енгізген ұсынымдардан кейін тауардың бір жиынтығының бағасы екі есеге төмендетілді. Осылайша, 7,1 млн теңге үнемделді.
Облыстың Сыбайлас жемқорлыққа қарсы қызметі тұрғындарды бюджет қаражатының жұмсалуын қоғамдық бақылау шеңберінде белсенді азаматтық ұстаным көрсетуге шақырады.
