Ақмола облыстық ПД баспасөз қызметінің мәліметінше, Қосшы қалалық Полиция бөліміне Тайтөбе ауылының 21 жастағы тұрғыны хабарласып, ақпанның 3-не қараған түні белгісіз біреулер қазандық ғимаратынан «КамАЗ» жүк көлігінің аккумуляторларын, автономды жылытқышты ұрлап әкеткенін айтты. Келтірілген залал сомасы 1 млн теңгені құрады.
Ақпанның 6-да Целиноград ауданының Полиция бөліміне Қараөткел ауылының 39 жастағы тұрғыны өтінішпен жүгініп, үйдің ауласында тұрған «Шансиман» жүк көліген аккумулятор ұрланғанын айтты. Ал ақпанның 3-7 аралығында Қосшы қаласы мен Целиноград ауданының 7 тұрғыны полицияға осындай өтінішпен жүгінді.
Жедел-іздестіру іс-шаралары барысында криминалдық полиция қызметкерлері күдіктілердің жеке басын анықтады. Тайтөбе ауылының 24 жастағы тұрғыны мен Астананың 22 жастағы тұрғыны елорда маңындағы аймақта ұрлықтың 5 фактісіне қатысы бар екені анықталды. Зиянкестер ұрлықты түнде жасаған, ауыр жүк көліктері мен арнайы техникадан ұрланған аккумуляторлық батареяларды олар автомобильмен әкетіп, астаналық аккумуляторларды қабылдау пунктіне тапсырған.
Тәртіп сақшылары ұрланған аккумляторларды иелеріне қайтарды. Келтірілген залал сомасы 2 млн теңгеден асты. Барлық деректер бойынша ҚР ҚК 188-бабы 3-бөлігі «Ұрлық» бойынша сотқа дейінгі тергеу жүргізілуде. Тергеумен күдіктілердің барлық жағдайлары мен басқа да ұқсас қылмыстарға қатысы бар-жоғы анықталуда.
