Облыстық ТЖД баспасөз қызметінің мәліметінше, келеңсіз жағдай Аршалы ауданының Үлкен Сарыоба көлінде «Сарыоба» демалыс базасының жанындағы стихиялық жағажайда болған.
Анықталғандай, жағажайға демалуға келген екі отбасының кәмелетке толмаған балалары суға шомылған. Осы кезде екпіні 15-20 м/с жел тұрып, 14 жасар жасөспірім қыз жағадан ұзап кетеді. Мұны байқаған қыздың әкесі үрленбелі шеңберді алып қызын құтқармақшы болған, бірақ толқын оны да алып кетеді.
“Ер адам мен оның қызына бастапқыда «Сарыоба» демалыс базасында орналасқан 5 қоғамдық құтқарушы моторлы қайықпен көмекке келмекші болды. Алайда, техникалық себептерге байланысты моторлы қайық істен шығып, жарты жолда қалды. Кейін Нұр-Сұлтан қаласындағы Жедел-құтқару жасағының құтқарушылары шақырылып, алдымен 52 жастағы әкесін, одан соң 14 жастағы қызын аман-есен жағаға алып шықты. Қазіргі кезде әкесі мен қызының жағдайы тұрақты, медициналық көмекке мұқтаж емес”, – деді ведомстводан.
