Ағымдағы жылдың 26 сәуірінде Аршалы ауданының полиция бөліміне аудандық аурухана фельдшерінен Жібек Жолы ауылында ЖКО болғандығы туралы телефон арқылы хабарлама келіп түсті.
Елорданың 37 жастағы тұрғыны «ChevroletNexia» маркалы автокөлігінің жүргізушісі рульді басқара алмай, Жібек Жолы ауылының 45 жастағы тұрғынының басқаруындағы «КамАЗ» маркалы жүк көлігімен соқтығысуға жол бергені алдын ала анықталды. «КамАЗ» жүргізушісінің айтуынша, жеңіл автокөліктің жүргізушісі мас күйінде болған.
Тексеру кезінде 2023 жылғы наурызда елорда тұрғыны мас күйінде ЖКО жасап, ҚР ӘҚБтК 608-бабының 3-бөліміне сәйкес 7 жыл мерзімге көлік құралын басқару құқығынан айырылғаны анықталды.
ЖКО салдарынан «ChevroletNexia» маркалы автокөліктің жүргізушісі түрлі жарақаттармен Астана қаласындағы ауруханаға жеткізілді, «КамАЗ» жүргізушісі зардап шеккен жоқ, автокөліктерге механикалық зақым келді. Сараптама тағайындалды.
Осы дерекке қатысты ҚР ҚК-нің 346-бабы 1-бөлігі бойынша сотқа дейінгі тергеу жүргізілуде (көлік құралдарын басқару құқығынан айырылған және алкогольдік, есірткілік және (немесе) уытқұмарлық масаң күйде болған адамның көлік құралын басқаруы).
