Конституцияға өзгерістер мен толықтырулар енгізу жөніндегі референдумды қолдау бойынша «AMANAT» партиясының Ақмола облыстық штабының онлайн форматтағы алғашқы отырысы өтті.
Жиынды өткізген партияның Ақмола облыстық филиалының атқарушы хатшысы Ғалым Бекмағамбетов Президенттің жалпыұлттық референдум өткізу бастамасын қолдау жөніндегі «AMANAT» партиясының мәлімдемесін оқыды. «Президент Қазақстан халқына жариялаған биылғы Жолдауында ауқымды саяси реформалар ұсынды.
Бұл реформалардың мақсаты – халықтың әл-ауқатын арттыру, суперпрезиденттік басқару формасынан Парламент пен мәслихаттардың рөлі күшейген саяси жүйеге көшу, демократиялық процестер қарқынын үдету, елдегі бірлік пен ынтымақты арттыру», – делінген мәлімдемеде.
«Сондай-ақ, ауқымды реформалар сайлау, партиялық және сот-құқықтық жүйесін, аумақтық-территориялық құрылымы мен мемлекеттік биліктің бөліну принципін түбегейлі өзгертетіні сөзсіз. Мемлекет басшысы ұсынған кешенді реформаларды жүзеге асыру үшін Конституцияға 33 өзгеріс пен толықтыру енгізу қажет. Аталған өзгерістерді құқықтық тұрғыда бекіту үшін Президент республикалық референдум өткізуді ұсынды. Конституцияны жалпыхалықтық дауыс беру арқылы өзгерту – «мемлекеттік биліктің бірден-бір қайнар көзі – халық» деген принциптің іс жүзінде орындалуының айғағы. Сондықтан «AMANAT» партиясы Конституциялық реформаның маңыздылығын терең түсіне отырып, алдағы референдумды өткізуді толық қолдайды!»
Ақпараттық-түсіндіру жұмыстары мен іс-шараларды ұйымдастыру үшін партияның облыстық филиалы 20 штаб құрды. Олардың құрамына өңірдегі және аудандардағы «AMANAT» партиясының активі кірді. Бұл жұмысқа облыстық және аудандық мәслихат депутаттары, зиялы қауым өкілдері, мәдениет пен спорт қайраткерлері, партияның жастар қанаты мен аудандардағы филиалдар атсалысады. Партия мүшелері өңірлерде және шалғай елді мекендерде сайлаушылармен кездеседі деп жоспарланған.
«Мемлекеттік басқару жүйесін өзгертіп, елдегі саяси ахуалға жаңа дем беретін Конституциялық референдум – жалпыхалықтық деңгейде алғаш өткізіледі. Бұл – «Халық үніне құлақ астаны мемлекет» идеясының нақты жүзеге асуының дәлелі. Ел тағдырын айқындайтын осынау маңызды кезеңде ешкім шет қалмауға және тарихи таңдау жасауға тиіс. Еліміздің стратегиялық болашағын айқындайтын референдумға қатысу барлығымызға ортақ борыш!»,-деді жиынды қорытындылаған партияның облыстық филиалының атқарушы хатшысы Ғалым Бекмағамбетов.
Жиын соңында штабтардың жұмысын жоғары деңгейде ұйымдастыруға қатысты бірқатар нақты тапсырмалар берілді.
AMANAT партиясы.
