Ақмола облысында республикалық маңызы бар автомобиль жолдарын қысқы уақытта күтіп-ұстауға 260-тан астам техника дайындалды. Жалпы, өңірде «ҚазАвтоЖол» ҰК» АҚ ұлттық операторы басқаратын республикалық маңызы бар екі жарым мың шақырымнан астам автожол бар.
Жолдарды қысқы күтіп-ұстау өңірдің көлік жүйесіндегі маңызды кезең болып табылады. Ол жолдарды қар мен мұздан тазартуды, көктайғақтың пайда болуын болдырмау үшін жол жабындысын реагенттермен өңдеуді, жол белгілерін, бағдаршамдар мен жарықтандыру құрылғыларын орнату және олардың жұмысқа қабілеттілігін қолдау арқылы жолда көрінуді қамтамасыз етуді, жол жабынына тұрақты техникалық қызмет көрсетуді және жөндеуді жүргізуді, сондай-ақ жолда авариялық жағдайлар туындаған жағдайда авариялық-қалпына келтіру жұмыстарын ұйымдастыруды қамтиды. Ол үшін «ҚазАвтоЖол» ҰК» АҚ Ақмола облысы бойынша филиалы қыс мезгіліне 263 бірлік қар жинайтын техника, 25 мың текше метр көктайғаққа қарсы материал, 700 тонна химиялық реагент және 600 тонна техникалық тұз дайындады.
Республикалық жолдарды күтіп ұстау сапасын бақылауға «Жол активтері сапасының Ұлттық Орталығы» РМК Ақмола облысы бойынша филиалы ерекше назар аударады. Жолшылар қысқы кезеңде автожолдарды күтіп-ұстауға қойылатын негізгі талаптар айқындады. Өйткені, бұл талаптардың сақталуы жол қауіпсіздігіне өз әсерін тигізеді.
«Автожолдар мен жол құрылыстарын қорғау бойынша дайындық іс-шаралары уақтылы жүргізілуі тиіс, ал жолдарды қардан және қар үйінділерінен тазарту уақтылы жүргізілуі тиіс. Жол ұйымдары қазірдің өзінде көктайғаққа қарсы материалмен қамтамасыз етілуі тиіс, ал олардың техникасы жөнделіп, жарамды күйде болуы және жанар-жағармай материалдарының қажетті көлемімен қамтамасыз етілуі тиіс. Автожол бойында қар ұстайтын қоршаулар да тиісті жағдайда әкелінуі тиіс», – деп атап өтті филиалдың сапаны бақылау және мемлекеттік есепке алу бөлімінің бастығы Игорь Стефан.
Облыстық маңызы бар автомобиль жолдарын күтіп ұстау бойынша мердігер ұйымдармен шарттар жасалды, 132 бірлік қар жинайтын техника жұмылдырылды, инертті материал сатып алынды, облыста қар үйінділеріне барынша бейім жолдардың тізбесі бар. Мердігерлік ұйымдарда жанар-жағар маймен көктайғаққа қарсы материалдың қажетті қоры бар. Жол учаскелеріне белгілі уақытта шығу үшін жылытылатын үй-жайлар мен техникаға арналған гараждар бар.
Сондай-ақ, аудан әкімдіктері мен жергілікті шаруашылық жүргізуші субъектілер арасында 333 меморандумдар мен шарттар жасалды, оларда аудандық маңызы бар жолдарды және елді мекендердің көше-жол желісін тазалау шаралары көзделген.
