Бүгін «Nur Otan» партиясы Ақмола облыстық филиалының Саяси Кеңес Бюросының кезекті отырысында Сайлауалды бағдарламаның орындалуын бақылауға алатын 12 қоғамдық кеңестің құрамы мен төрағалары бекітілді. Мен өз салам, білім және ғылымды дамыту бойынша қоғамдық кеңестің төрағасы болып сайландым.
Білім – өлшеуі жоқ қазына десек, бүгінгі заманда білім беру ісін дамытып, реформалап отыру аса қажет дер едім. Бүгінде ел жаңарып, қайта жаңғыру басталып жатыр. Материалдық игілік дамып, тұрмыс түзелді. Енді санамызды жаңғырту керек. Ал саналы азамат ол алдымен білімді азамат. Партияның алдағы бес жылдыққа арналған Сайлауалды бағдарламасында білім беру саласына ерекше назар аударылған. Оның ішінде материалдық техникалық базаның жаңаруы, үш ауысымдық мектептердің санын азайту, бүлдіршіндерді балабақшамен толық қамтамасыз ету, оқулықтар сапасын жақсарту, ұстаздардың біліктілік деңгейін көтеру сияқты негізгі басымдықтар Сайлауалды бағдарламада көзделген. Бүгінгі таңда облыста 610 мектепке дейінгі ұйым, 557 мектеп, 33 колледж, 4 ЖОО жұмыс істейді.
3 жастан 6 жасқа дейінгі балаларды мектепке дейінгі біліммен қамту 100% – ды құрайды, 1 жастан 6 жасқа дейінгі балаларды мектепке дейінгі біліммен қамту 75,4% – ға дейін ұлғайды.
2014 жылдан бастап жаңа үлгідегі кабинеттермен жабдықталған мектептердің үлесі 42% – дан 52% – ға дейін өсті. Тегін ыстық тамақпен 1 сынып оқушылары (16 мың бала) қамтылған.
Білім сапасын арттыру үшін «Nur Otan» партиясы келесі міндеттерді алға қояды:3 жастан 6 жасқа дейінгі балаларды мектепке дейінгі тәрбиемен және оқытумен толық қамтуды сақтау және 1 жастан 6 жасқа дейінгі балаларды қамтуды 85%-ке дейін ұлғайту жөнінде шаралар қабылдау;бірінші сынып оқушыларын тегін ыстық тамақпен 100% қамтуды сақтау;саны аз 250 шалғайдағы ауылдық мектептердің штаттық режимде және 307 мектептің дистанциялық режимде жұмыс істеуін ұйымдастыру. Қашықтықтан оқыту кезеңінде жеке компьютерлік техникасы жоқ оқушылар мен мұғалімдерге уақытша пайдалануға мектеп компьютерлері немесе ноутбуктері беріледі (ағымдағы жылы 1383 бірлік сатып алынды, тағы 429 бірлік компьютерлік техника сатып алу жоспарланған);ауылдарда 10 жаңа мектеп және Көкшетау қаласында 1 мектеп салу, үш ауысымды білім беруді жою үшін қосымша оқу корпустарын салу үшін Көкшетау қаласының 4 мектебінің алаңын кеңейту;2021 жылы Жарқайың ауданындағы Державинск қаласындағы мектепті жөндеу, Жарқайың, Біржан сал, Бұланды аудандарында және Жарқайың ауданының Фурманов ауылында авариялық мектепті жою үшін жаңадан мектеп салу;60 білім беру объектісіне жөндеу жүргізу (жыл сайын 12 объекті бойынша);облыстың барлық 555 мемлекеттік мектебін кезең-кезеңімен химия, биология, физика пәндері кабинеттерімен жарақтандыру;педагогтардың 85% -ын аттестаттаудың жаңа жүйесімен қамту;ТжКБ түлектерінің жұмысқа орналасу деңгейін 75%-ке дейін жеткізу, кадрларды даярлау сапасын арттыру және дуальды білім беру қағидаттарын сақтау есебінен.
Нәтижесінде 2023 жылға қарай аймақтағы үш ауысымды мектептер мен апатты жағдайдағы мектептердің мәселесі 100% шешілетін болады.
Маған осынау қиын да жауапты қоғамдық кеңесті басқаруды сеніп тапсырған әріптестеріме, партия басшылығына ризашылығымды білдіре отырып, алдағы уақытта Сіздермен тығыз байланыста жұмыс істейміз деген сенімдемін. Барлық сұрақтарыңыз бен игі бастамаларыңызға ашықпын. Бірге талқылайық !
Марат Сырлыбаев
Білім мен ғылым мәселелерін дамыту бойынша қоғамдық кеңестің төрағасы
Ақмола облыстық мәслихатының депутаты.
