Ақмола облысы бойынша Мемлекеттік қызмет істері агенттігінің департаментіне Көкшетау қаласының әкімдігі «Жер учаскесін жеке меншікке немесе бөліп-бөліп сату» мемлекеттік қызметін көрсетуден бас тару мәселесімен өтініш беруші жүгінді.
Осылайша, өтініш беруші 2007 жылы мемлекеттен жалға алынған жер учаскесінде көлікжай салып, оны сол жылы заңдастырған.
Қазақстан Республикасы Жер кодексінің 52-бабының 1-тармағына сәйкес ғимараттарға меншік құқығы заңнамада белгіленген тәртіппен аталған ғимараттар орналасқан жер учаскесіне меншік құқығын білдіреді. Аталған құқықтар бір-бірінен бөлінбейді.
Осыған байланысты, меншік иесі өзінің заңды құқықтарын іске асыру үшін Көкшетау қаласының әкімдігіне жер учаскесін сатып алу туралы өтінішпен жүгінген, алайда оған жергілікті атқарушы орган жер учаскесінің нысаналық мақсаты қаланың бас жоспарына сәйкес келмейтіндігін атап, мемлекеттік қызметті көрсетуден бас тартқан.
Дегенмен Департамент тексеру барысында анықтағандай, Көкшетау қаласының бас жоспары өтініш беруші өз құрылысын жүзеге асырғаннан кейін бекітілген.
Сонымен қатар, жер учаскесін жеке меншікке сату кезінде осы мемлекеттік қызметті көрсету қағидаларында сұралып отырған жер учаскесін аумақтық аймақтарға бөлуге сәйкес мәлімделген нысаналы мақсаты бойынша пайдалану мүмкіндігін айқындау тәртібі көзделмеген, өйткені бұл мәселе жер заңнамасына сәйкес жер учаскесін мемлекеттік меншіктен бастапқы беру кезінде қаралады.
Осыған байланысты Департамент мемлекеттік органның бас тартуын негізсіз деп танып, әкімдікке көрсетілетін қызметті алушының бұзылған құқықтарын қалпына келтіруге міндеттейтін шешім енгізді.
Соның нәтижесінде Көкшетау қаласының әкімдігі өтініш берушіге жеке меншікке жер учаскесін сату туралы қаулы қабылдады.
