Бүгін Қазақстан Республикасының Мемлекеттік қызмет істері агенттігі төрағасы жұмыс сапарымен Ақмола облысына болды. Іссапар барысында Дархан Жазықбаев өңірдің мемлекеттік қызметшілерімен, Агенттіктің Ақмола облысы бойынша департаменті және ҚР Президенті жанындағы Мемлекеттік басқару академиясы филиалының ұжымымен кездесу өткізді. Жиында мемлекеттік аппараттың жұмысын бюрократиядан арылту, мемлекеттік қызметті алуда әкімшілік кедергілерді жою, сондай-ақ халықтың билік институттарына деген сенім деңгейін арттыру мәселелері талқыланды.
Агенттік төрағасы «мемлекеттік қызметті түбегейлі жаңғыртудың басты мақсаты – халық үніне құлақ асатын мемлекеттік аппаратты қалыптастыру» екендігін атап, мемлекеттік қызметшілерді сыбайлас жемқорлыққа, мүдделер қақтығысына, заңға қайшы әрекеттерге, қоғам тарапынан сынға ұшырайтын қылықтарға, мемлекеттік аппараттың абыройы мен беделіне нұқсан келтіретін әрекеттерге жол бермеуге шақырды.
Өңірдің жас мемлекеттік қызметшілер мен жоғары оқу орындарының түлектерімен арнайы жүздесу мақсатында Агенттік төрағасы облыстық Жастар-ресурстық орталығына барды. Дархан Жазықбаевтың айтуынша, Агенттік тарапынан жас мамандарды мемлекеттік қызметке іріктеуді жеңілдету бойынша бірқатар ұсыныстар дайындалды. Мәселен, жоғары оқу орындары мен колледждерде мемлекет есебінен білім алып, оқу үлгерімінің орташа балы (GPA) жоғары деңгейді көрсеткен жас маман иелерін аудандық және ауылдық деңгейдегі төмен лауазымдарға конкурстан тыс негізде қабылдау ұсынылып отыр.
«Болашақта орталарыңызда мемлекеттік қызметке келемін деген жастар болса, менің сіздерге айтарым – басты мақсат – үлкен бастық болу емес, ел игілігі үшін қызмет атқару болуы керек. Мақсат жеке мансаптық амбицияларға емес, ең алдымен қоғамдық мүдделерге негізделуі тиіс», – деп атап өтті Д. Жазықбаев.
Сонымен қатар, Агенттік төрағасына мемлекеттік қызметке орналасу, мемлекеттік бағдарламалар, гранттар, жеңілдіктер, ипотекалық несиелендіру бойынша тегін әрі шұғыл консультативтік көмек қызметтерін көрсететін Көкшетау қаласындағы Жастарға қызмет көрсету орталығының жұмысы ұсынылды.
Сапар барысында Дархан Жазықбаев Ақмола облысы білім басқармасы жанындағы «Болашақ сарайының», сонымен қатар Көкшетау қаласының және Бурабай ауданының Халыққа қызмет көрсету орталықтарының жұмысымен танысып, қала әкімдіктерінде азаматтарды қабылдады. Жергілікті халық тарапынан туындаған сауалдарға жауап беріп, жиында көтерілген түйіткілді мәселелерді шешу мақсатында Агенттіктің аумақтық Департаментіне бірқатар тиісті тапсырмалар берілді.
