Ақмола облысы Ішкі саясат басқармасының «Қоғамдық даму орталығы» КММ ұйымдастыруымен «Достар» мәдениет үйінде Ауған соғысы аяқталуының 35 жылдығына орай «Ауған ақиқаты» тақырыбында іс-шара өтті.
Игі шараның мақсаты – жастарды отансүйгіштіккке тәрбиелеу, өскелең ұрпақтың Отанға деген құрмет-сезімдерін арттыру, еліне деген сүйіспеншілігін ояту.
Алқалы жиынға Ақмола облысы Ішкі саясат басқармасының басшысы Алмас Алин, Ауған соғысының ардагерлері, ҚБ және зиялы қауым өкілдері, «Қоғамдық даму орталығы» КММ қызметкерлері, колледж студенттері мен мектеп оқушылары және БАҚ өкілдері қатысты.
Іс-шара барысында Ақмола облысы тарихи-өлкетану музейінің қызметкерлері мектеп оқушылары мен және колледж студенттері үшін «Уақыт бізді тандады» атты көшпелі көрме ұйымдастырды.
Экскурсия барысында Ауған соғысына қатысқан жауынгерлердің фотосуреттері,олардың әскери жабдықтары және тұрмыстық заттары көрсетіліп,олар туралы ақпарат берілді.
Тағылымды шараны Ақмола облысы ішкі саясат басқармасының басшысы Алмас Алин құттықтау сөзімен бастап, Ауған соғысының Ардагерлеріне алғысын білдірді. Сонымен қатар, «Ақмола облысындағы Ауған соғысы ардагерлері одағы» ҚБ төрағасы, ҚР Қорғаныс Министрлігі Жоғары техникалық мектебінің директоры, облыстық мәслихаттың депутаты Дуанбай Кәзібайұлы Ыбрай, Көкшетау қалалық ардагерлер Кеңесінің төрағасы,қоғам қайраткері, еңбек ардагері, Көкшетау қаласы және Зеренді ауданының құрметті азаматы Шияп Әлиев, еңбек ардагері және коғам қайраткері Мейрамбек Қиықов, Сәкен Жүнісов атындағы №18 мектеп-лицейдің тарих пәнінің мұғалімі, тарих және әлеуметтік дінтану ғылымдары магистрі, зерттеуші-ұстаз Арман Абилкадыров Ауған соғысына шолу жасап, жастарға тәлімді баяндама жасады.
ҚР журналистер одағының мүшесі, публицист, Ауған тақырыбына арналған бірқатар кітаптардың авторы, «Ауған қозғалысына қосқан үлесі үшін» медалінің иегері, Көкшетау қ. қоғамдық Кеңесінің мүшесі, «ҚР білім беру ісінің үздігі», ардагер ұстаз Әлия Ахетова Ауған соғысы кезіндегі отты жылдар туралы жазған «На той войне незнаменитой» атты кітабынан үзінділер оқып, ардагерлердің ерліктері туралы баянды. Айта кетсек, ақпанның 15-ші жұлдызында автордың «На той войне незнаменитой» кітабының III томы жарыққа шығады.
Сондай-ақ, сұрапыл соғысқа қатысып,талай сарбаздардың өмірін құтқарған абзал жан, бүгінде Көкшетау қаласының «Отбасылық денсаулық орталығының» медбикесі Гүлнәр Макишева да сөз сөйлеп, сонау қасіретті жылдарды еске алды.
Шара барысында Ауған соғысы Ардагерлеріне ән-шашу арналып, кәдесыйлар табысталды.
Ауған соғысының Ардагерлері үшін ұйымдастырылған тағылымды шарадан қатысушы жастар рухани әсер, біраз мағлұмат алды. Сол жылдар болған оқиғалардың сюжетын көздерімен көріп, өз ойларына түйіндеді.
Біздің айтарымыз, енді бұндай барша адамзатқа қайғы-қасірет әкелетін соғыс болмасын деп тілейміз!
Тәуелсіз еліміз ашық аспан астында өркендеп, халқымыз бейбіт өмір кешсін дейміз.
Еліміз тыныш, халқымыз аман болсын!
Айгүл Үстембек, «Қоғамдық даму орталығы» КММ Ақпараттық – талдау бөлімінің маманы.
